പ്രശസ്ത തെന്നിന്ത്യൻ നടിയായ ശ്രീയ ശരൺ തന്റെ പേരിൽ ആൾമാറാട്ടം നടത്തിയ വ്യക്തിക്ക് ശക്തമായ മുന്നറിയിപ്പുമായി എത്തിയിരിക്കുകയാണ്. തന്റെ പേരുപയോഗിച്ച് ഒരാൾ പല ആവശ്യങ്ങൾക്കുമായി താനുമായി വെന്ധപ്പെട്ടവരെ സമീപിക്കുന്നു എന്നാണ് താരം പറയുന്നത്. തട്ടിപ്പിനായി ഉപയോഗിച്ച ഫോൺ നമ്പർ താരം തന്റെ ഇൻസ്റ്റാഗ്രാം അക്കൗണ്ട് വഴി പങ്കുവെച്ചു.
താൻ ഏറെ വഹുമാനിക്കുകയും ഒപ്പം പ്രവർത്തിക്കാൻ ആഗ്രഹിക്കുകയും ചെയ്യുന്ന വ്യക്തികളെ പോലും ആ വ്യക്തി സമീപിക്കുന്നതായി നടി വെളിപ്പെടുത്തി. താരത്തിന്റെ വാക്കുകൾ ഇങ്ങനെ; ” ആരായിരുന്നാലും, ഈ വിഡ്ഢിത്തം അവസാനിപ്പിക്കണം. ആളുകൾക്ക് മെസ്സേജ് അയച്ച് അവരുടെ സമയം കളയുന്നത് നിർത്തുക. ഇത് അങ്ങേയറ്റം ബുദ്ധിമുട്ടിക്കുന്നതും വിചിത്രവുമാണ്. ഇയാൾ മറ്റുള്ളവരുടെ സമയം വെറുതെ പാഴാക്കിയതിൽ എനിക്ക് ഖേദമുണ്ട്. ഇത് ഞാനല്ല, ഇത് എന്റെ നമ്പറുമല്ല. ഒരു നല്ല കാര്യം എന്തെന്നാൽ, ഈ വ്യക്തി ബന്ധപ്പെടുന്നത് ഞാൻ ആദരിക്കുകയും ഒപ്പം പ്രവർത്തിക്കാൻ ആഗ്രഹിക്കുകയും ചെയ്യുന്ന ആളുകളെയാണ് എന്നതാണ്.
